soley.blog.is

Stolið af vef Sóleyjar Tómasdóttur, mæli með þessari síðu, margt gott, skemmtilegt, áhugavert og síðast en ekki síst feminískt!

Hvernig tengjast kynjahlutföll jafnrétti?

"Mér finnst það ekkert sérstaklega flókið - en athugasemdir á blogginu mínu að undanförnu gefa tilefni til smávegis útskýringa. Tvær nýlegar fréttir sýna ansi mikla kynjaslagsíðu í dómum og ég þykist fullviss að konur, sem hafa ótvírætt meiri skilning á reynsluheimi kvenna en karlar, myndu leiðrétta hana - a.m.k. að hluta til.

Á mbl.is í dag er greint frá dómi sem karlmaður hlaut fyrir stórfellda líkamsárás á fyrrverandi konu sína. Sannað þótti að hann hefði valdið konunni umtalsverða áverka, enda hafi hann brugðið belti eða lykkju um háls hennar í kyrkingarskyni. Ofbeldið stóð í 20 til 30 mínútur. Fyrir vikið hlaut maðurinn 9 mánaða skilorðsbundið fangelsi.

Á mbl.is þann 20. desember sl. er greint frá dómi sem karlmaður hlaut fyrir að stela 8 lambalærum, lambakótilettum, lambahrygg, þremur ýsuflökum og fæðubótarefnum úr ýmsum matvöruverslunum í Reykjavík. Þýfið var metið á um 55 þúsund krónur. Fyrir vikið hlaut maðurinn 6 mánaða óskilorðsbundið fangelsi.

Tvennt finnst mér einkar athyglisvert þegar dómarnir eru bornir saman:

Ef 55.000 krónur þýða 6 mánaða fangelsi - er þá hægt að verðleggja konuna á 82.500 krónur?
Ef skilorðsbinding dóma fer eftir því hversu hættulegir glæpamennirnir eru sjálfum sér og samfélaginu - má þá álykta að matarþjófurinn sé hættulegri umhverfi sínu en ofbeldismaðurinn?

Þetta er bara eitt lítið dæmi um vermætamat og forgangsröðun dómskerfis og löggjafarvalds. Það er nauðsynlegt að refsilöggjöfin taki til alvarleika mála og að dómskerfið meti afbrot út frá sjónarhóli beggja kynja.

Eins og fram kom í bloggfærslu minni í gær eru konur 23 af 63 þingmönnum í dag og hæstiréttur samanstendur af 2 konum og 7 körlum. Þessu þarf að breyta ef lýðræðið á að virka sem skyldi."
Sóley Tómasdóttir

Mikið svakalega er ég sammála henni.
//eög