Ahrif þess að hafa piku

Eins og sannri konu sæmir tek ég áskorun Valdísar um að spælast. Hef ætlað mér að koma með þessar vangaveltur í lengri tíma. Svo er mál með vexti að ég er að vinna á Læknamiðstöð Austurbæjar, allt í góðu með það. Nema hvað að ég er ekki sérlega ánægð með launin. Var í smá bobba. Átti ég að sætta mig við þau á grunni þess að ég væri hvort eð er bara í sumarvinnu? Eða átti ég að standa á mínu og biðja um hærri laun? Jú, góðir lesendur. Ég tók af skarið, blés í lófana og sendi launaguttanum emil og krafðist hærri launa í ljósi upplýsinga af vefsíðu VR sem studdu mínar kröfur. Enda þýðir ekki að nöldrast yfir launamun kynjanna til dæmi, ef ég nenni svo ekki sjálf að biðja um kvennsæmandi laun.
Sit hér nú og bíð eftir svari. Mun hann taka þetta stinnt upp eður mun hann vera ánægður með framhleypni mína og bjóða mér enn hærra tímakaup? Tja, tíminn einn mun leiða það í ljós.

Um daginn var ég að ræða hinn alræmda launamun kynjanna við vinnufélaga minn og við vorum að spekúlera í því hvers vegna í ósköpunum konur væru með lægri laun en karlar þegar þær hafa miklu fleiri fasta útgjaldaliði en þeir? Sko. Til dæmis eru tíð útgjöld er tíðir ber að garði, sem er svona sirka einu sinni á mánuði hjá hverri konu, og þarf því kona að vera vel birg af dömubindum, túrtöppum og verkjalyfjum. Nota bene: dömubindi eru ein dýrasta vara sem fæst í stórmörkuðum um þessar mundir. Lýg því ekki. Svo skellur einnig ágætur kostnaður á konur því þær bera enn mesta ábyrgð á því að getnaðarvarnir séu í lagi, kaupa því pilluna, verjur og aðrar varnir í gríð og erg, alla vega gríð.

Ef við förum svo lengra í þessum pælingum má benda á heilbrigðiskostnað. Konur þurfa bæði að fara til kvensjúkdómalæknis reglulega til að tékka á píkunni og svo í krabbameinsleit þar sem bæði er þuklað á brjóstum og píku. Það kostar sitt, fyrir utan andlega vanlíðan sem því fylgir að glenna sitt allra heilagasta upp í opið geðið á ókunnugri manneskju. Ofan á þetta allt saman bætast svo skoðanir ef kona er með barni.

Svo ég spyr: Hví eru konur ekki með langtum hærri laun en karlar vegna langtum hærri fastra útgjalda?

Hér skal skýrt tekið fram að ekki er verið að tala um kostnað vegna fegrunardútls sem svo margar skvísur telja nauðsynlegt.

Að lokum: mér reiknast svo til að ef einn dömubindapakki kostar u.þ.b. 878 krónur (ekki staðfest, leiðréttið ef þið eruð með aktúelt verð) og tvo pakka þurfi til á mánuði til að hindra flóð úr nærbuxum, og aðrar forsendur þær að kona sé í u.þ.b. 30 ár á túr, frá 14 ára aldri og fram yfir fertugt (44 ára), þá er árskostnaður vegna tíðagjalda (ekki töðugjalda) 21.072 krónur á ári eða 632.160 krónur í 30 ár.

Takk fyrir og verið góð hvert við annað. Ekki veitir af.
//eög